الحب مش اختيار ولا عمره بيكون مصير بأيد اى انسان انه يملكه ويحكمه ويسيطر عليه وعلى خطاويـه وياه
كتير مننا بيحب او بيصدق نفسـه انه بيحب مهما كان حاله او مشواره ومهما كان فكره او نظرتـه بس اكيد سمح للحب انه يدق بابـه
مش لازم يكون جرب يحب مـره او اكتر الاهم انـه حس وفهم يعنى ايه حب
عرف ان الحب مش لعبـه بين اتنين يفرحوا ويقربوا من بعض ويتسلوا لوقت ويسيبوا بعض ويفكروا فى ارتباط جديد او حسب رؤيتهـم حب جديد
ده مش بيكون حب الحب عمره ما كان لعبه بين اتنين الحب قادر انه يلعب بيهم ويعذبهم وينسيهم كيانهم الحب ليه قوتـه وقدرته
الانسان اللى بجد حب قبل كده جرب وفهم وحس يعنى ايه حب عاش فرحه وحزنه وانكساره وعاش وياه قلقه وحيرته وشكـه وغيرتـه
هوه اللى هيقدر يفهم ايه اللى هاكتبه واحكيه واشرحـه كلامى هيتحس ويشوفـه بقلبـه قبل عقلـه رغم ان الاتنين
زى كفين ميزان لازم يكون فيه اتزان وثبات والعقل بيكون له الاولويه بس بعد ما بيجرب ويقاسى ويعانى ويفهم يعنى ايه حب
مش هقول ليه احنا بنحب علشان دى حكايـه تانيه كبيره قوى بلاش نحكيها دلوقتى
بس هحكى عن الحب وافكاره وظنونـه وشكه وجنونـه وتعلقنا بيه وسيطرتـه علينا
من كل فكـره بتدور فى عقلنا وتشغل قلبنـا فى دايره حب وقصـه من بدايتها للنهايه
مش تجربـه شخصيـه او محاولـه تحليل دى هتكون محاوله لفهم طبيعه النفس نفسى ونفسك فكرى وعقلك وقلبها
من البدايه للنهايه فى كل المراحل بس حاول تقرا الكلام بقلبك واحساسك وروحك ووجدانك قبل عقلك وفكرك
بدايـه الحب
امتى تحس انك حبيت
هنحاول نشخص حالته وتأثيره وامتى يكون صابك واعراضه اللى تظهر عليك مش لانـه مرض وانما لكونـه احساس وفكر وحاله صابت النفس
والفكر وبشكل مفاجىء
لو فجأه وانت فرحان وهادى والدنيا معاك ماشيه عادى ولقيت انسانه قدامك فجأه اتشديت وسكت وتحس بصدرك فجأه اتوقف للحظه وعينيك عليها
لما تحاول تبعد بعنيك عنها بس مبتقدرش ترجع من تانى تبص عليها مهما كان اللى هايحصل ولو انكشفت نظرتك واللى بتعبر عنها
مش بتهتم بده قد ما بتكون حقيقى محتاج انك تتأملها وتخلى عينيك عليها
احساس بيكون جواك جديد بتقدر تحس انه مش اعجاب بشخص عادى لفت نظرك بشىء جواه او باين عليه
دا بيكون حاجه اكبر من الاعجاب حاجه بتشدك بتسحب منك حاجه فى صدرك ناحيتها بس رجليك بتتثبت مكانك وبتروح بروحك ليها
وعينيك محدده طريقها للشخص ده بس
لو انسانه عدت من قدامك ولفت نظرك حاجه فيها بتكون مجرد حاجه وعدت بصيت وخلصت واتفضيت انما لما فجأه تلاقى عينيك بتتسحب
ونفسك بيقف وتسكت وتفضل ساكت وعينيك محتاره جواها كلام كتير نفسها تقوله بس خايفه ومش عارفه ايه بالظبط تقوله يبقى مش اعجاب وعدى
دى حاجه اسمى واكبر
لما تعدى من قدامك ويصيبك اللى صابك وتعدى هيه وتفوت وتلاقى نفسك نفسك من مكانك تمشى وتلف وتدور باى حجه ومع اى حد وتاخد روند
علشان تشوفهـا من تانى ولما تشوفها تبص عليها وتبص قوى وتحاول تعوض كل لحظه عدت وقت ما بعدت من قدامك
وتكون ساكت صامت مش شايف فى طريقك الا هيه بتعدى انت وتفوت وعنيك مش نازله من عليها نفسك انها تبصلك وتشوفك
نفسك انها تحس بانك حقيقى مشدودلها وبتحس انت بالحيره والضعف من جواك وماليك تحس انك روح ماشيه وقلب بيدق بزياده وماشى مش حاسس بحاجه غير انك خفيف كده وطاير
لما تقرر انك ممكن تقف مش مهم تحت شمس او ضل بتقف طول ما هيه واقفه قدامك بس من بعيد شويه تتأملها وتبصلها وعنيك عليها
بس من تحت لتحت عايز تبصلها وخايف من رد فعلها لو لاحظت عليك اللى باين عليك وماليك وايه هيكون فكرها وردها
لما تعدى فى أى يوم تانى فى نفس المكان اللى شفتها فيه واول حاجه تبصلها المكان اللى كانت بتقف فيه ونفسك من تانى تشوفها
لما تشوفها واقفه وتحب انك تروح تقف جنبها بشويه ممكن تختلس نظره ليها ترضيك وتريح قلبك او تحس بانها هتحس باللى جواك وعايز تقولـه ومش عارف ايه بالظبط اللى هاتقولـه
لما تحس بخوف جالك متعرفش منين وليه وازاى لما تسأل نفسك هوه فيه ايه وليه حصلى كده مانا كنت عادى وماشى هادى ولا كان فى بالى
وليه هيه بالذات وايه اللى جرالك بالتحديد ومتعرفش تجاوب على نفسك غير بالحيره
لما تدور عليها فى كل وشوش الناس اللى بتقابلهم فى اى طريق بتمشيه واى مكان تانى بعيد عنها ونفسك تشوفها
لما تبص لكل واحده هتقابلها وفيها حاجه منها نفس الطول نفس اللون نفس اللبس وتحاول تصبر نفسك من جواك بانك لقيت حاجه منها
لما تفكر فيها فى كل وقت بيعدى عليك لما بتشتاق حقيقى انك من تانى تلاقيها والوقت يعدى بسرعه علشان تشوفها من تانى
لما تحس ان الدنيا كلها نورت اكتر واجمل لما تحس بكل حاجه جميله حواليك ونفسك ترقص وتضحك وتصرخ وجواك تحس بفرحه ونشوه وحاجات تانيه مش قادر تحددها
لما تحضر مليون كلمه وتسأل نفسك ازاى تعرف تكلمها وتقولها كل اللى حسيته ولما تشوفها تلاقى نفسك من تانى ساكت وهادى بس من جواك حاسس بحيره وقلق واضطراب
لما تشوف واحد واقف بيكلمها مهما كان هوه مين تلاقى نفسك متغاظ وعلى اخرك
لما تحاول تعرف عنها اى حاجه اسمها سنـها لون بتحبه نوع موبايلها اى حاجه تتعلق بيها علشان تحبها وتقرب روحك ليها وتحبها علشان هيه بتحب ده
لما تشوفها بتتكلم فى الموبايل وانت هاتموت وتعرف ياترى مين ده اللى بتكلمـه
لما تسرح وتحلم فى كل كلمه فى اى اغنيه تسمعها وتعيشها وتحسها بكل حرف فيها وتتخيلها
لما تسأل نفسك كل وقت بتقف قدامها ياترى هيه فهمتنى ولا حستنى ولا خدت بالها والا انا مش فى بالها
لما تسأل نفسك ازاى البنت دى بالرقه العيون دى والضعف ده جواها كل القوه دى بقيت انت اسير ومسكين وضعيف وانت واقف قدامها
لما تسأل نفسك كانت فين من زمان وايه السر اللى جواها شدك ليها ايه الحاجه اللى عندها آسرتك وخلتك محتار وتقول معقوله هيه زينا كده
تحس بأنها مختلفه عن كل البنات عن كل البشر وتقول يا ترى هيه زينا كده جنون بس عادى كلنا بنفكر كده
وياترى اللى حواليها بيعاملوها بالشكل اللى تستحقه وبالحنان والرقه اللى لازم تكون ليـها
لما تحسد كل انسان شافها قابلها صادفها قبلك جار متعود انه يشوفها مدرس اتعود انه يشوفها مهما كان هوه مين بس شاف الكنز ده قبلك واتصادف بيه
لما تحس ان فات وضاع من عمرك كتير قبل ما تعرفها وعمرك حقيقى ابتدى من وقت ما شفتها عمرك اللى تتمنى انك تبنيه بأيدك لازم تكون الفرحه اللى حستها دلوقتى هيه بدايته
لما تتـصالح مع احزانك اللى عدت عليك فى عمرك وتعالج كل حاجه انكسرت جواك وترجع من تانى تلملم اللى انكسر جواك والدنيا خلاص صالحتك بيها والنهارده يوم جديد وحياه تانيه
لما تحس انها روح وانسانه وحيده مسكينه هايمه تايهه بتناديك محتاجالك علشان تحس معاك طعم الدنيا والفرح والخوف عليها والاهتمام بيها
لما تقول لنفسك يااااااه لو هيه تفهم وتعرف اللى جواك فى قلبك ليها ساعتها هيه اللى هتناديك علشان محتاجه الحب والاحساس والدفء والفرح اللى شايله فى قلبك علشانها هيه بس
لما تتخيل انها بقت معاك وانت بقيت عايش فى قلبها وروحها وتحلم وتتخيل فى احلام واوهام بتمنى نفسك بيها واحلام يقظه نفسك تبقى حقيقه
لما بتشوفها فجأه تحس فجأه برهبه وخوف وتحس انك بقيت مكشوف والناس كلها حواليك حاسس انهم فاهمين ايه اللى انت مخبيه جواك وانه باين عليك
لما تكون نفسك تقرب وتحكيلها بكل اللى فى قلبك بس بتخاف تقرب منها وتسأل نفسك ايه ياترى هيكون مصيرك معاها هتفرح والا هاتتعلق بيها وتنجرح
بتحاول تحكم على الحكايه واحساسك وافكارك بعقلك بس ده بيكون محال لانك خلاص بقيت مشدود ليها ومش قادر تفكر الا بيها وليها كل اللى بتحسه
وبيكون وقت التفكير بالعقل عدى وفات وحبها اتمكن منك ودخل قلبك واحساس بقى فى روحك جواك
لما تحاول انك تعالج كل شىء غلط بتعمله وتحاسب على كل لفظ تقوله بتحس انك بقيت ملزم بالتغيير من جواك علشانها وعلشان اول انطباع منها عنك
لما تحس انك بقيت احن واخلص وانسان تانى اهدى واعقل وكل حاجه حلوه بقت فيك لما تحس ان الدنيا بتصالحك على حاجات كتير عدت واتألمت منها واحزان كتير جواك لسه مش ناسيها لما تتقابل مع الانسانه دى
لما تحس بأنك نفسك تروحلها وتقف قدامها ومتتكلمش نفسك بجد تقف ساكت تبص لعنيها وتبكى وتغسل القلب اللى ياما شاف وتعب قبل ما تشوفها
ونفسك انها تحس بيك وبأحزانك وبتعبك فى الدنيا ومن الاحساس اللى حسيته من ساعه ما شفتها والفكر اللى تاه جوه عقلك وتعبك نفسك انها تحس بكل ده
نفسك انها تقولك خلاص انسى اللى فات انا قدامك ليك علشانك انا قدرك خلاص انت لقيت حلمك ومصيرك وعمرك الجاى وسعادتك هتكون ملكك منى انا
لما تتمنى انها تمسك ايديك وتحتويك وتمتص بسحرها وقوتها ورقتها كل احزانك وخوفك وتتمنى انها هيه اللى تحتويك وتضمك وانك بتكون وياها طفل برىء ضعيف محتاج حنانـها
لما تحس انك ضعيف وخايف وحساس وانك حقيقى انسان
لما تحس انك مش هتقدر تعيش الا معاها وبيهـا وهيه اللى هتكملك فى الدنيا
لما تحس بكل ده وتلاقى نفسك بترجع من تانى لسؤالك اللى مش بتعرف ليه اجابه
ايه اللى حصلى واشمعنى هيه وليه مش قادر اعيش من غير ما افكر فيها هيه بس
وقتها هتعرف انك خلاص حبيت والحب اتمكن منك وسكن قلبك وكبر جواك وكبرته انت باحساسك وحنيتك واخلاصك كبر وبقى ماليك
ومش قادر تعيش الا بيه وليه وعلشانه وفاض منك وبان عليك
من نظرات عنينك من رعشه ايديك من القلق والاضطراب والحيره اللى بتبان عليك من شرودك من لهفتك من سكوتك وانت قدامها
وبقى فى روحك عايش بيه وهيه عايشه جواك لا قادر تبعد عنها ولا تعيش من غير ما تفكر فيها قربها منك بقى غايتك ومناك
بقى روحك وهواك بس ازاى تقدر توصلها وتقولها وتبوح عن كل اللى جواك وياترى هتحس حقيقى بيك والا هتهملك وتكسرك حقيقى وترفض كل اللى فى قلبك
ياترى عندها ذكاء وإحساس يرضيك ويرضيها لما يخليها تعرف تقدر وتحس بكل اللى جواك ياترى انت ايه بالنسبالها
اسئله كتير هتدور جواك فى عقلك وجه خلاص وقته العقل
حاول دلوقتى بقى تفكر بيه وانسى قلبك لو هتقدر واحكم على اللى جواك واللى تتمناه يكون بين ايديك ومعاك بالعقل
قبل ما ترجع من تانى تنجرح وتتندم انك اهملته وتتحسر على ضياعك لفرصته انه يتكلم وينطق وينورلك طريقك وسكتك
لازم تسأل نفسك دلوقتى وياريت كان قبل كده قبل ما الحب يتمكن منك بالشكل ده وتوصل لمرحله سيطره القلب وتقبلك تاثيره بصدر رحب
ماهو الصدر قلب والقلب لو اتمكن من غير العقل يبقى عذاب ومرض وسحل لنفسك
حاول تجاوب لنفسك على كل اللى هيدور فى راسك ومخك وتفكيرك ومتهربش وتخلى قلبك يقول نفس الكلام اللى هتهرب بيه من عقلك
اصل انا بحبها وهاعمل ايه واللى هتختاره هتشوف نهايته بعدين
حبيتها ايوه حبيتها ايه اللى حبيته فيها بالظبط شدك ليها حاجه واحده ولا كل حاجه جواها
كل حاجـه طيب عرفت منين ايه اللى جواها كلمتها عرفتها ناقشتها فهمتها لا ومتكدبش على نفسك
هاتقولى ياعم كل حاجـه اصل انا حسيتها
طيب وده كفايه انها تستحق بالشكل ده حبك مانت ياما هتحلم وتفكر وتسرح وتدوب وتوه وتعيش علشانها قبل نفسك
طيب وانت عايز منها ايه بالظبط
هاتقولى بحبها ومش قادر تعيش من غيرها اوكى انا معاك بس اعرف انك لسه مكلمتهاش ومتعرفهاش ومتعلقتش بيها والاهم انها متعلقتش هيه بيك
وبعد ما انت تحبها وهيه كمان اتعلقت واتمسكت بيك وحقيقى حستك وفهمتك وبقيت انها حبيبها ومهما تخيلت عمرك ما تفهم يعنى ايه انسانه حست بالحب
البنت هيه سر الحياه ومصدر الحنان والحب اللى اتوجد لو بتحبوا بعض بجد فحبها بيفوق حبك بدل المره الف
لو وصلتوا للمرحله دى علشان ترضى قلبك وهيه فهمتك ومش قادره لا تعيش ولا تكمل من غير حبك ولا انت تقدر تنسى حبها جواك
ييجى اهم سؤال
اخر حبكم لبعض ايه
متنساش انكم عايشين فى دنيا وليها حسابات تانيه وامورها مش مبنيه بأحكام القلب والمشاعر
ممكن اه اصدقك لو فى جانب العلاقات الانسانيه بين الناس وبعضهم انما الحياه نفسها مبنيه على حسابات وعقل ومنطق
الدنيا وامورها بالعقل واللى يعرف يفكر ويخطط وينفذ هوه اللى يقدر يوصل لهدفه وحلمه اللى بيحلمه بعقله وبيحبه بقلبه
زمان كنت تقدر على حبك جواك هتعانى اكيد وكل ما حكمت بقلبك اكتر كل ما هتتعب علشان تنسى اكتر
بس دلوقتى فانت مسئول عن انسانه معاك حبت حبك وحبته جواها عاشت معاك وعلشانك مسئول عن مصيرك ومصيرها وهيه معاك ماخلاص بقيتوا واحد
زمان انت خططت وقربت والحب ماليك وبان عليك ومقدرتش غير انك تتكلم وتشغلها وتربطها بيك وهيه مسلمه ومآمنـه بكلامك واحلامك
تقدر تعيش وتحس انك كنت انانى وخاين وظالم جرحتها وياك وظلمتها معاك لما منيها بحاجات ودنيا ومستقبل مش وياك ولا بأيدك حلم حلمته بهواك واتبنى بقلبك مش بعقلك وفكرك
لو يكون مصيركم البعد هتتعبوا كتيييييييييير قوى وكل واحد فيكم هيكون مسئول انه يداوى اللى انجرح وانكسر جواه هيتعب ويتألم وكل الجروح بتوجع وتاخد وقتها لحد ما ييجى عليها وقت وتطيب
وجرحك هتداويه انت بايدك طيب وجرحك ليها بسببك انت منك انت تقدر تتصور هيه هتعيش وتنساه ازاى وانت هتشوف نفسك ايه لما تحب انسانه وتروحلها وتخليها تحبك وتفتحلك قلبها وتبوحلك بسرها
وعلشانك انت يكون حلمها وتعيش علشانك انت انت بس مش حد تانى كان وجودها جنبك مقويك مخليك تدوق سعاده عمرك ما عيشتها وكل حزن جواك اتمحى بسحرها
حاجات كتير مهما اتخيلتها عمرك ما تقدر تحسبها ولا تقارن عاشت معاك بروحها اسمى حاجه عندها بقت ملكك ليك علشانك
وفى الاخر تنجرح هيه منك لما تقربلك وتسمحلك بقلبها تقدر تقول ايه كان ذنبها
الذنب منك انت والعيب بسببك انت انت اللى محسبتش صح مفكرتش بشكل سليم
قبل ما توصل للمرحله دى
يبقى تحكم بعقلك فى اول لحظه تحس بالحب ايه هيكون مصيرك ومصيرها لما الحب تسمحله يعيش جواك ومتقدرش عليه ويبان عليك وتقرب منها وتخليها تعيش علشانك
قربكم سوا هيكون لأمتى تتمناها تكون شريكتك حبيبتك صديقتك اختك وكمـان بنـتـك طول عمرها وياك تعيش معاها اللى جاى من عمرك وعمرهـا
يبقى اعرف ايه تقدر تقدمه ايه اللى معاك وتقدر تعمله علشان تبنى الحياه دى وتحولها من حلم عايشه بروحك لحقيقه عايشها بكل ما فيك
اوعى تكون انانـى وتظلم نفسك وتظلمها معاك خلى العقل يقول رأيه وتحترم انت رأيه وتأمن وتسلم بيه وتعرف امكانياتك فى المرحله والعمر اللى عايشه يسمح ولا لأ
كلنا هنفرح وكلنا هنحب ونعيش بس لكل حاجه وقتها
زى ما تتمنى تاخد حب وحنان وسعاده وفرح وبيت واولاد ينوروا حياتك لازم تدى انت كمان اللى يضمن دوام الحال ده اعمل اللى عليك علشان تقدر تخلى الحلم يبقى حقيقه
اضمن انك تبنى بيت وتكون مسئول عنها وتحسب دوامه واستمراره فى العمر اللى جاى
فكر بالعقل واوعى تنساه واوعى تفكر ان الحب لعبه وتسليه والا هوه اللى هيعلمك ايه قوته وقسوته اللى هتخسرك كتير
ولو مش هتقدر تسعد انسان ياريت بلاش تظلمـه