farfor

هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

This mountada for any one on any age


    حكايات الحب معانا2

    karyokey
    karyokey


    عدد المساهمات : 129
    تاريخ التسجيل : 25/02/2011
    العمر : 26
    الموقع : رومانسى

    حكايات الحب معانا2 Empty حكايات الحب معانا2

    مُساهمة  karyokey الخميس مارس 10, 2011 12:32 pm



    التوبيك الاول اتكلمنا فيه عن دخول الحب فى قلوبنا وفتره الاعجاب والاقرار بأننا خلاص عايشين فى حاله جديده جميله هاله من النور بتملانا بتبان فى عينيا بنشوف
    الدنيا اجمل واحلى وكلها نور وسعاده وفرح

    بس الاهم من الاعجاب التواصل بين قلبين بين روحين والا الحب يعذبنا لما نداريه ونخبيه حقيقى هيبان علينا لما يتمرد على صمتنا وجمودنا وسكاتنا هيعذبنا علشان يشوف النور ويعيش فى حريته وراحته
    يحب يخرج من صدورنا بيحلم باللحظه اللى نتكلم فيها ونبوح ونكشف عنه بيحتاج يعيش طليق وحر من غير تقيد وحبس ويملا الدنيا الوان وبهجه

    الحب بنحسه ونفتحله قلوبنا يعيش جواها لما حقيقى بنحتويه ونحافظ عليه هيرتاح ويسكن بس اكيد هييجى ووقت يحب انه يعبر عن وجوده عن ذاته عن كيانه بيحمسنا بيحركنا بيقدر يخلينا ناخد اول خطوه ونتكلم

    المرحله التانيه
    التواصـــــــــــل

    الخطوه الاولى لازم تكون من الشاب مش البنت بس قبل ما نحكى عنها نسأل نفسنا سؤال مهم

    الحب فيه مستحيـــل ؟

    اى حاجه مقيده وليها حدود ونظم بيكون دايمآ ليها مستحيل ودنيتنا كده فيها حواجز
    وعقبات وفيها مستحيل ولا تجاوز

    الحواجز هيه كل حاجه وكل ظرف بيعترض طريقنا للوصول لهدف فى حياتنا
    الحواجز بتكون مقاسه بقدرتنا وارادتنا لو اقوى بنقدر نتغلب على اى عائق فى
    طريقنا حتى لو وقعتنا وخسرنا بتكون جوله انما مش بتكون نهايه لحلم وغايه

    الشاطر اللى يقدر يتعلم ويعالج نفسه واخطائه ويعرف ايه اللى عطله ووقف مسيرته فى الوصول للحلم المنشود
    والاشطر اللى بيفهم ازاى يقدر ويحسب صعوبه الحاجز والعقبه اللى بتواجهه وحجم الطاقه اللى جواه وقوته الذاتيه اللى بيقدر بيها مع شويه جهد وتعب وتصميم يناضل ويحارب ويتخطى كل الحواجز ويوصل لحلمه
    والحاجز ممكن يكون عقبه قابله للتخطى والتجاوز او يكون خارج حدود الطبيعه او بمعنى مستحيييييييل



    المستحيل بنحسـه وبنعرف كمان انه موجود ودايمآ نتجاهله وبايدينا بنهرب منه
    هاقولك

    مثال \ لما بتحبى بتسيبى نفسك للحب مع الانسان اللى بتحبيه وبستهينى بظروف فى الحقيقه مش بتنكرى انها اكبر منه ومنـك
    ظروف فى الدنيا انه من طبقه او وسط مختلف عن وسطك أو ......والارتباط بيكون مستحيــــل
    بس بتهربى من المستحيل ده وبتسميه الصعب
    وتقولى ان دايمآ فيه امل فى حياتنا وتقولى هيقدر وعلشان بيحب هايتغير وهايكون احسن وهايحقق كل احلامه وهانكون لبعض ده اكيد

    شيىء جميل طبعآ ان يكون عندنا امل فى حياتنا وثقه فى شريكنا وفقدرته على تحمل المسئوليه ومواجهه كل الصعاب بس ياترى سألتى نفسك بعقل
    ايه اللى هايقدر بجد وحقيقى يوصل ليه لما يحمس نفسه ويحاول
    هايوصل لحلمكم سوا برغم الظروف اللى بيعانيها ولا لأ ؟
    حكمتى عليه بالنسبه للصوره اللى شايفاها ليه فى قلبك ولا لحقيقته فى الدنيا
    الصوره الطبيعيه من غير اى محسنات واضافات روحيه ملائكيـه

    شايفاه بقلبك ولا حكمتى بعقلك !!!


    مثال \ انت كمان لما بتحب بتحلم فى افق عالى من غير اى حساب بتحلم وتتخيل وتمنى نفسك وبعالم تاني من غير اى انسان غير حبيبتك بتسمع فى اغانى بتحسها وتتخيلها فيها
    بتتفرج على افلام رومانسيه وتتخيل ان الزمن والواقع مختلف وان ابطال الفيلم انت وحبيبتك بتهرب من الدنيا والحياه اللى بتعيشها لتخيلات
    وتقول لنفسك ياسلام بقى لو اعمل زى ما البطل عمل كــده اكيد حبيبتى تستحق ده
    البطل عمل لحبيبته كذا لو انا كنت عملت نفس الحاجه ودار نفس الحوار بس بينى وبين حبيبتى كنت هاكون اصدق منه وحبيبتى هتكون اسعد من حبيبته وطبعـآ حبيبتى تستاهل منى اكتر من كده

    مش ده المستحيل اللى اقصده دى تخيلات وجنون وطالما قدرت اوصل للجنون فى الفكر يبقى اكيد قدرت اعبر عن الحب بشكل اقرب واسلم

    المستحيل فى كل لحظه بتشوف حبيبتك فيها وانت جواك سؤال دايمآ هايحيرك فى بدايه رحلتكم سوا
    معقوله البنت اللى انا بحبها وبسرح فى خيالى واروح لبعييد لبعيد قوى هيه دى

    طيب ماهى زينا والله وعندها عينين هيه حقيقى حلوه بس عادى زينا وايدين ورجلين وعادى طب والله بتاكل زينا دى بشر
    بس بشر ازاى واللى كنت بفكر فيها وانها حقيقى ملاك وبحس انها اقرب انسانـه للملاك طب والله ملاك

    بتحاول توافق بين الواقع اللى انت فيه والخيال اللى فكرت فيه وده شىء محال
    الواقع حاجات كتير بتكون حواليك شاغلاك بتمر عليك وتفكر فيها حسابات كتير بتدور فى عقلك وفى وقت واحد

    الخيال عالم ذهنى روحى خلاب من غير حواجز ولا حدود كل الامانى فيه حقايق كل حاجه بتتمناها بتكون حقيقه فيه فى سماء فكرك جوه عقلك واحساسك
    وبتحس بالمستحيل ده للسبب ده وان كلامك واحلامك اللى سهرتك وشغلتك فى ليالى كتير عدت عليك من ساعه ما شفتها واتعلقت بيها مقدرتش تصرح بيه وتعبر عنه بالشكل اللى حلمته فى كل لحظه مرت عليك

    ____
    بس معلومه صغيره هاتريحك

    البنت دايمآ بتكون اذكى واعقل وبتقدر تفهم اكتر من اى ولد فى كلام العينين بتفهمك وتحسك وتعرف انت عايز تقول ايه
    وتعبيراتك وحيرتك وكسوفك وخوفك بيتكون دليل ليها على صدق احساسك
    ____

    هاتقولى طيب وليه هيه طالما عرفت وفهمت وحست مش بتتكلم وتقولى انها فاهمانى وتصارحنى وتريحنى بقى من الحاله اللى بكون فيها

    لسببين
    الاول
    كبريائها كأمراه يحتم عليها انها متصارحكش باللى انت تحارب قدامها علشان تقوله

    انت اللى لازم تقول حتى لو متأكد انها بتحبك قدك ميت مره
    بس الخطوه الاولى لازم تكون منك انت مينفعش بنت مهما كانت حاسه بالحب تروح لولد وتقولـه انا بحبك حتى لو متأكده انه بيحبها
    مينفعش بنت تعمل كده بأى شكل منكرش ان فيه بنات ممكن تقول وتعمل بس بتكون حاله هبل وجنان والبنت بتندم عليها بعدين
    والولد ممكن يحس انها هديه على طبق من فضه ميحسهاش علشان متعبش
    وكل واحد لازم يتعب علشان لما يوصل لحلمه يعرف ازاى يقدره

    وده طبعآ لو تقبل الفكره وكان فعلا بيحبها او مش رافض حبها ليه
    وممكن كمان يحس بيها ويعيش فى حاله الحب اللى حاساها ويكون مش بيحبها
    ازاى
    اكتر حاجه ممكن تجرح انسان ولد او بنت بتحب انها تكتشف ان الانسان اللى بجد من كل قلبها حبته واتمنته وكانت عايشه تحلم بيه
    كان بيحب حبها ليه بيستمتع بيه كان بيرضى حاله نقص جواه وبرغم اللى بتعمله هيه علشانه
    يكون واهمها انه بيحبها وفى الحقيقه يكون بيحب حبها ليه انما مش بيحبها

    نوع من الأنانيـه والاستغلال وانعدام الضمير والغبــاء

    المهم هتفكر فى الطريقه اللى تخليك تكلمها
    حد يعرفك عليها
    روحت من نفسك ووقفتهــا
    مهما كانت الوسيله بفرض ان ده حصل

    تبدأ تطبق وتبين وتكشف عن كل الطاقه الروحيه وكل الشحنه العاطفيه اللى دارت فى عقلك وفكرك وخيالك واللى حلمته واتمنينه تحاول تحققه وهيه وياك وقدامك وعيونها فى عينيك
    تحاول
    تقول كل الكلام وتبوح باللى جواك واستحضرته بروحك وخيالك وتصارع من جواك علشان تخلى عينيك تتكلم وايديك تعبر ونظرتك ليها تبين
    وعينيك تكون محتاره وبتدور مش عارفه على فين بتحاول انت تصدق انك خلاص بقيت فى الواقع والحقيقه ووسط اختبار صعب
    ازاى تقدر تقول وتتكلم على اللى شايله جواك فى قلبك تحكى عن الاحساس اللى بتعيشه كل ثانيه بتفكر فيها لوحدك
    وتحاول
    عينيك تهرب من نظره عينيها اللى بتبص عليك وبتكشفك بتحس ان عيونها بتكشف روحك وشايفاك من جواك وقلبك بيدق بقوه وايديك حاسه برعشه
    وفجأه ايديك تمسح على جبينك واضطراب كده وتبصلها تلاقيها قدامك عينيها عليك ساكته مبتكلمش بتسمع ومتجاوبش شايفاك وفاهماك

    هاتقول لنفسك اكيد هتقول عليك مجنون واكيد هتحتار من اللى شايفاه قدامها حركات ورعشات واضطراب وخوف ماليك وفاض عليك وظهر فى ملامحك ولهفتك
    وصوتك مكتوم بيصارع علشان يصارح ويبوح بنفس الحوار اللى حلمته
    شويه تتكلم بسرعه وشويتين تسكت وتقول
    اصل وانا وكنت بقول وعايزك تعرفى وبجد وحقيقى وبصراحه اناااااااااا شوفى هوا كنت عايز اقولك
    وحاجات تانيه كتيييييييييييييير بالشكل ده

    مش بتمثل بس بتحاول تفرغ كل الرومانسيه اللى جواك ومهما حاولت بيكون مستحيييييييييل ومهما الكلام صدر منك عمره ما بيقدر يعبر عن كل اللى فى قلبك وروحك

    المهم سعادتك اكيـد هتقول
    انا طبعآ من ساعه ما شفتك وانا معجب بيكى ونفسى اتعرف بجد عليكى وتصارحها ولو مقدرتش هتجاوبك هيه وهتساعدك علشان بيكون كلامك مبين كل حاجه مخبيها

    هتسألك وتقولك انت عايز تقول انك بتحبنى ؟
    طبعآ سيادتك واى شاب مش انت لوحدك هتحس بمفاجئه وهتتصدم من صراحتها وعينيك هتدور وتحاول تهرب من استجوابها
    وتقول مش عارف بس حاسس بكده اصل انا يعنى وبصراحه وفى الحقيقه وكلام تانى كتير مش هتعرف انت بتقول ايه بالظبط
    شويه تمتمه وطلاسم وحاجات غريبه كده وكلام مش مفهوم بتحاول تهرب بيه من اصعب سؤال بيواجهك فى حكايه الحب اللى عايشها
    ترددك اللى بيكون غصب عنك والخوف اللى بيبان فى عينيك من ردها عليك ومفاجئتها ليك وقت ما تصارحها باللى جواك
    لما تغمض عينيك وتاخد نفس عميق كده زى الشاطر وتقولها اه
    اه والله بحبك والله العظيم بحبك مش بكدب عليكى بس والله دى الحقيقه مش عارف ازاى قدرت اقولها بس لازم تصدقينى انا فعلا بحبك

    جميل انك تعبر حقيقى بس الاجمل انك تكون جرىء وتقول الكلام بشكل صريح وتتغلب على التوتر اللى بيظهر عليك
    والافضل طبعآ ان عينيك هيه اللى تتكلم وتقول
    اى بنت بتحتاج وتحلم بأن العيون هيه اللى تبدأ الحكايه وتكملها
    ومتخافش البنت بتفهم كويس لو عينيك هيه اللى اتكلمت وصارحت
    اللى بيبان عليك بيبين صدق كلام عينيك


    والولد لما بيحب بيكون اسمى واغلى حلم فى حياته انه يكون لحبيبته وتكون هيه ليه
    لازم يتمرد على اى لحظه خوف جواه ويتعلم ازاى يقدر يتغلب على كل الجمود اللى بيصيبه ويعدى كل الحواجز اللى بتقابله فى طريقه

    السبب التانى
    احساسها كــــأمراه حاجه كده جواها فى تركيبها النفسى نبع حنان بتحسه انما متقدرش تفهمه ولا توصل لنهايته
    طبيعه فيها اتولدت بيها حاول تحسها انما متفكرش انك تفهمها او تقيسها علشان مش هتعرف
    القوه هيه قدرتنا على التحكم فى داخلنا وذاتنا والبنت بتحس بجد بتلذذ وارضاء ليها ولكيانها لما تشوف حبيبها بيحارب علشانها حتى لو كان بينه وبين نفسه
    بيحاول يفك علشانها كل العقد اللى على لسانه بيحاول يغير من نفسه ويزيل كل السكات اللى جواه ويحكى ويتكلم ويقولها اغلى كلمه بتتمناها بحبـــــك
    مش لازم يقولها بهمس ولا ينادى ويعلى صوته ويقول بحبــــــــك زى ما بنشوف فى افلام كتير

    الاهم لما يقولها انه يكون بجد حاسسها تكون صادره من جواه والبنت بتحسها لو كانت صادقه وصادره من القلب
    كلمـه من اربع حروف بس بتكون كافية بتقدر تثبتلها صدق كلامك وتمسسك بيها واحساسك ليها
    ودليل هيه بتحتاجه علشان تطمن نفسها من كل اللى فهمتـه منك وحسته هيه بقلبها
    بتكون محتاجه منك التصريح ده بالشكل ده او بالصدق ده علشان تحلم معاك وتعيش هواك وتهديك انت حبهـا



    على قد ما تتمنى اللحظه اللى بيكون فيها كلامك من قلبك ليها واقف قدامها وعينيك عليها وانت بتتكلم وهيه سامعاك شايفاك
    بيكون فيه حاجات غريبه وفكر مختلف خالص بيحصل فى الظروف دى

    ممكن واحد يكون عاطفى قوى ورومانسى بجد بيتمنى انه يلمس ايديها عايز يحس انها حقيقه عايز يصدق خلاص انه بقى فى الواقع بتكون الفرحه فى قلبه مش قادر عليها ولا قادر يصدق ان ده حصل
    بيكون حجم الفرح والامعقول اللى حاسه مش قادر يصدقه والتردد اللى بيعانيه علشان يعبر ويقول خلاه يتلجلج فى كلام كتير بيتمنى حاجتين اغرب من بعض

    الأولى ان الارض بجد تتشق وتبلعه علشان يستريح من المعاناه الى بيكون فيها بس قلبه ميطاوعوش يغيب عن عينيها او تغيب هيه عنه
    واللحظه قدام عيونها بتروى قلبه وتطمنه من اللى بجد داقه فى انشغاله عليها حاجه كان بيتمناها ولقاها

    التانيه ان اى حد ينادى عليه علشان يسلم عليه او يسأله على اى حاجه والسلام ويستأذن ويروح يتكلم فى اى حاجه مع اللى جاله
    علشان يحرره من العذاب اللى واقف لوحده بيدوقه ولا حد حاسس بيه
    يروح ويتكلم ويستهدى كده شويه ويرجع من تانى وياريت يكون عرف يجمع الكلام ويرتبه علشان يقوله ويكمله

    هاتقول مهما هاتقول

    وترجع من تانى نفسك تقابلها علشان وحشتك وعلشان مؤشر الشحن العاطفى اللى فى قلبك اكتمل وعايز تفضفض وتحكى وتبوح من تانى
    وده بيكون سبب لحاجه دايمآ بتحصلنا وبنقول عليها ونحكى


    لما بكلمها فى التليفون بلاقى نفسى بتكلم عادى خالص بس جوايا كلام كتير بس مش عارف معرفتش اقولها اى حاجه غير بحبك وخلى بالك من نفسك
    ولما قفلت معاها لقيت نفسى عايز اكلمها من تانى علشان وحشتنى تصدق دى ؟

    جمله بتتقال وبتكون واقعيه وبتحصل دايمآ وبنحسها على طول فى ايامنا






      الوقت/التاريخ الآن هو الخميس ديسمبر 09, 2021 8:36 am